蜜糖芥末豬手

昨天弄了個"泡椒雞腳"，盛了個白鹵水汁料，唔想浪費，今日買了些豬手，用白鹵水汁煮好，加入自製嘅《蜜糖芥末醬》
正！

我本來想買新鮮好多肉哪種，因為本來想去骨後淨肉來吃，不過實在太貴，一隻要成三十幾元，對我呢啲師奶仔來說，唔太化算，下次請客先至買靚豬手來整！
我買凍肉店的，大約 $12元 買了 6 塊.............

解凍後，烚過水，再沖凍水，放入昨天用剩的白鹵水汁，利用三開三烚三關火原理，即係靠焗，一共做了三次，每次焗起碼一個鐘，出來就不會過腍過硬，口感剛剛好..............

攤凍後，本想去骨，不過見冇咩肉，乾脆直接撈入芥末醬！

蜜糖芥末醬：
蜜糖                 約 3 湯匙
芥末                 約 3 湯匙
豉油                 約 1 湯匙
拌勻就淋落豬手度，放入雪櫃，雪凍便可上枱！！！

這味蜜糖芥末醬，加入其他食材一樣可以！
夏天就最開胃！！！

我打算一家人睇世界杯最後一場，整幾味小吃，給老公大爺及仔大爺睇波送啤酒！！！

麻辣豬耳
泡椒雞腳
蜜糖芥末豬手
烤雞翼

嘩！送啤酒..............人生一樂也！！！想想也開心！！！